本
文
摘
要
《福尔摩斯》（六、七、八案）
《官场现形记》
《洗耻记》
《秘密使者》（上、下）
《血性男子》
《明季稗史》
《西装石头记》
《人体解剖图》
畀你咁样一种书单，你系咪觉得冇咩特别，但系如果话畀你听，呢啲书其实系百几年前嘅广州人睇嘅，你会有咩反应？
以上嘅书单系来自于光绪末年一间叫宝云楼嘅书庄，入边所记载嘅系宝云楼当年新鲜上架嘅图书。 系咪好惊讶，原来百几年前嘅广州人唔系日日只读圣贤书，反而佢哋同我哋一样“接地气”，都系会追《福尔摩斯》呢啲侦探悬疑小说，又会涉猎野史书籍，甚至嗰时已经售卖本土印制嘅《人体解剖图》。
百年前嘅广州人，钟意睇咩书？广州越秀区公园前附近，有一片又几条街区连结成嘅街区，系清代广州非常出名嘅文化街。
此街区内嘅书坊，占当时广州书坊总数嘅80%以上，各地嘅文人墨客、过往官员都会流连于此，选购中意嘅书籍。 而当时热销嘅书籍种类包括有：侦探小说类：如《花月痕》、《牛马经》、《雾中人》、《尸椟记》、《夺嫡奇冤》、《狸奴角》、《刘公案》等。睇嚟古人都一样会中意睇侦探悬疑，而当时广州有一间英华书庄专营此类小说。
教材类：如《奏定学堂章程》、《小学各科教授法》、《本庄氏历史教授法》、《奏定女学堂章程》等清末废除科举，提倡新学，各类新式学堂对教材嘅需求量大增，好多书局开始重视教科书嘅刻印发行。
言情小说：如《红泪影》、《伉俪福》、《茶香梦》、《空即色》、《情天孽警》、《上炉香》、《风花雪月》等20 世纪后，社会日益开放，新式知识分子追求浪漫和趣味性，以描写才子佳人、男欢女爱为主嘅言情小说兴起，受市场欢迎。
地方轶事：如《广东英雄》、《广东女英雄》、《广东豪杰》、《广东女才子》、《广东才子》、《广东花月记》、《广东奇人》等地方故事，八卦传闻，更能脍炙人口，会流行都系好正常。 其中有啲神奇嘅书名，比如《怕老婆》，实在冇办法查证书嘅内容，唔知佢系属于咩类型嘅小说啦。百年前嘅广州人，识花式打广告！为咗销售新书，有生意头脑嘅广州书商肯定会无所不用其极，务求令到新书一上架就个个争崩头。 由于当时媒体种类有限，广州书坊推出新书，会喺主流报纸同公共场所进行宣传，写出新书嘅书名、价钱及购买日期同时间，爱书之人见到自然会去书坊购买。
《广东白话报》当时广州嘅报纸之一，1907年创刊，全用粤语写稿。
为咗出奇制胜，一啲刻书商仲会充分利用营销手段，策划读者欢迎嘅活动，嚟推销新书。 如《广报》刊登过一则关于《芥子园初集》嘅广告，描述书籍嘅价值：《芥子园画传》乃鸳湖张子祥先生家藏原谱 ，久为艺林珍贵。今付石印以广流传，并增辑海上名人任伯年等数十家集成大观。如蒙鉴赏者，可至制台新丰街头巷户部谢寓购取。（翻译：我本书好鬼珍贵，好鬼罕有、好贵全面！行过路过都唔好错过啊！快啲过嚟买！）《爱阅小说者快看》曾经对小说打五折促销，以增加销量——言情小说《红泪影》四册，定价一元六角，特价八角， *** 《伉俪福》一册，定价五角，特价二角五。五折促销啊，如果喺依家就同双十一大促销一样啊！
有啲刻书商会刊登小说概要，引起受众注意小说《茶香梦》嘅广告：“述某茶室主人及靓梳佣阿娥二人一生历史。 用深曲之笔、浅白之词，描写社会状态，穷形尽相，颇堪发剧”。（翻译：茶餐厅老板与索女仆不得不说嘅情史，只有你谂唔到，冇我写唔出嘅）
仲可以介绍作者，利用名人效应，吸引读者购买。如一则《惟一趣致新书出版》广告，就对作者大加赞美：“欧君博明为报界中诸部之巨子，每出一艺，人争欢迎，笑谈歌谣、谐文小说皆极趣妙。 诚有目共赏者也，今选其佳作，排印成帙曰《空即色》，曰《情天孽警》，曰《上炉香》，曰《风花雪月》。 ”（翻译：呢个作者明日之星嚟噶，每次啲书一上架就卖晒，唔紧要我哋今次加印咗十万本，就等你嚟买！）
书坊、书庄嘅人气鼎盛，令到有啲同行借势营销，比如有啲报纸喺书坊附近设立分销点，利用书庄人群集中，文化消费旺盛嘅特点嚟提高报纸销量。百年前嘅广州人，点解可以睇到咁多书？广州人之所以可以睇到咁多书籍，离唔开印刷术嘅贡献。唐朝，广州作为重要嘅通常港口，大量商品进出，印刷术大概喺呢个时期传入广州。
广州地理优势，财力宽裕，而广州历代地方官员注重文化教育，设立刻书机构，大力推行刻印书籍，所以广州印刷技术慢慢走向全国顶尖。 到咗晚清时期，广州书坊（可以理解为印刷厂）之多，已达全国第三，仅次于北京、苏州。《中国印刷史》中曾举出“清代刻书要地”六处，其中两处就系广州同佛山。
加上当时广州人开始设立机器印刷厂，引进西方嘅“电版”技术，此时广州印刷技术已经非常高超，可以套印图画以及多种颜色文字，版面、设色皆非常精美，但成本比内地书坊要更加低。 印刷成本嘅降低，使到书籍嘅定价适中，符合普罗大众嘅消费能力，令到当时嘅广州人文化消费欲望大增。呢个亦都系广州近代学术风气蓬勃，人才辈出嘅重要原因。
而百年后嘅广州人，虽然有咗更先进嘅印刷工艺、更方便嘅购书渠道，但系阅读风气反而日渐低迷。 所以，睇到呢度嘅你，系咪应该系时候问下自己，上次一次认真睇完一本书，系几耐之前嘅事啦？
